![](https://blogger.googleusercontent.com/img/b/R29vZ2xl/AVvXsEgWkZ0vx4hYQA5jGiocS69JxW8d1T-95x0QhXl2HC_43gta9QSiCfviAo8uMn00VHQDIyYfY6UKFSvNgPCpY6Ijy7hqfb7-YmhDbhINsN5VsSbBm0meD5wjXUbsWdflFH-I9A60/s320/IMAG0843.jpg)
Na rúa grande, onde a pendente empeza a perder forza, antes da fonte dos dous caños, a carón da casa do Cura, construida sobre a vaidade da do Conde de Oleiros, ahí está a casa rural Caldelas Sacra. Quique e Euxenia, logo de moitos traballos e viaxes por mares que non eran os seus, non lograron borrar o tatuxe que imprime na memoria o lugar onde un nace e se fai. Voltaron a terra e levantaron con moito esforzo, mimo e ilusión este pequeno hotel con restaurante. Na galería, onde o rico e poderoso Don Germán ollaba para as súas posesións na ribeira, hoxe pode calquera, vilego ou aldeán, sentar na súa mecedora e saborear un caldo, un revolto de grelos, un polbo ou un bacallao á galega, e acompañalo con calquera viño da variada adega da Ribeira Sacra. O ambiente confortable, tranquilo e luminoso, está presidido por un retrato dunha parella de vilegos, antergos do Quique, que observan a circulación de ricas viandas que lles van pasando por diante, e non acadan de dar fe desta época, na que a fartura está bastante xeneralizada.